कन्या भोज, महाआरती अउ भव्य जंवारा विसर्जन बनिस आकर्षण के केंद्र; छत्तीसगढ़ के जम्मो जिला संग दूसर राज ले घलो पहुंचिन श्रद्धालु
झलमला, बालोद। शारदीय नवरात के पावन अवसर म गांव झलमला के गंगा मइया मंदिर म ए बछर नौ दिन तक आस्था, भक्ति अउ लोक संस्कृति के अद्भुत संगम देखे बर मिलिस। मंदिर म 1300 जोत जंवारा जलाय गे रिहिस। नवरात के पहिली दिन ले दसमी तक अलग-अलग धार्मिक अउ सांस्कृतिक कार्यक्रम होवत रिहिस, जेमे कीर्तन, नाचा, जसगीत, रामधुनी अउ झांकी प्रमुख रहिस।
गंगा मइया के दरसन अउ जोत जंवारा देखे बर झलमला गांव के संगे-संग आसपास के गांव के मनखे मन घलो पहुंचत रिहिन। छत्तीसगढ़ के जम्मो जिला के अलावा दूसर राज के मनखे मन घलो गंगा मइया मंदिर म जोत जलाए रिहिन। नौ दिन तक मंदिर परिसर म श्रद्धालु मन के भीड़ बने रहिस अउ पूरा गांव भक्तिमय वातावरण म डूबे रहिस।
रोज बिहिनिया-संझा होवत रहिस दुर्गा चालीसा पाठ, सात बजे गंगा मइया के आरती
नवरात के दौरान बनारस ले आए पंडित महाराज मन रोज बिहिनिया अउ संझा हवन कुंड म दुर्गा चालीसा पाठ करत रिहिन। गंगा मइया के आरती रोज संझा ठीक सात बजे होवत रिहिस। आरती म बड़ी संख्या म श्रद्धालु मन शामिल होके माता के आशीर्वाद लेवत रिहिन।
गंगा मइया के उद्गम भुइयां बांधा तरिया म पंचमी के दिन महाआरती के आयोजन करे गे रिहिस। गांव के इतिहास म पहली बेर बड़ी संख्या म भगत मन सकलाय रिहिन अउ महाआरती करिन। संझा के बेरा तरिया म इन्द्रधनुष चमकल, जेला देख के अइसन लागत रिहिस जइसे आसमान ले रंगीन रोशनी उतर आए हो।
अष्टमी म 1150 कन्या मन के कराय गिस भोज
अष्टमी के दिन 1150 कन्या मन के कन्या भोज कराय गे रिहिस। गंगा मइया के दरसन करे बर आए कन्या मन घलो ए भोज म शामिल होय रिहिन। गांव के महिला मन पंच अउ सरपंच के सहयोग ले कन्या भोज के व्यवस्था करिन।
200 जोत जंवारा के भव्य विसर्जन ले उमड़िस जनसैलाब
नवमी के दिन संझा करीब पांच बजे 200 जोत जंवारा के विसर्जन गाजा-बाजा अउ डांग के संग बांधा तरिया म करे गे रिहिस। जंवारा विसर्जन के झांकी देखे बर गांव अउ आसपास के मनखे मन के रेला लग गे रिहिस।
जोत जंवारा के जगमग रोशनी अइसन चमकत रिहिस, जइसे बिजली चमकत हो। विसर्जन झांकी के दौरान पूरा गांव म भक्तिमय वातावरण रहिस अउ बड़ी संख्या म श्रद्धालु मन माता के जयकारा लगावत नजर आइन।
नौ दिन तक भारी मेला, भगत मन के सेवा बर भोजन के व्यवस्था
नवरात के नौ दिन तक गंगा मइया मंदिर परिसर म भारी मेला भराय रिहिस। रात के बेरा पूरा क्षेत्र म कुंभ मेला जइसन माहौल देखे बर मिलत रिहिस।
दूर-दराज ले आए भगत मन के सेवा बर गंगा मइया समिति के डहर ले दाल-भात, पूरी-साग अउ खिचड़ी के जोरदार बेवस्था करे गे रिहिस। आवइया-जवइया भगत मन प्रसादी के लाभ लेवत रिहिन।
नवरात के नौ दिन तक मंदिर म गंगा मइया के दरसन करे बर आवत मनखे मन ल बूंदी के परसाद मिलत रिहिस। घर ले जाय बर घलो समिति के डहर ले बूंदी परसाद देय जात रिहिस।
पुलिस अउ स्वास्थ्य विभाग के घलो रहिस विशेष बेवस्था
नवरात मेला के देखरेख अउ सुरक्षा बेवस्था बर हजारों के संख्या म पुलिस बल तैनात रिहिस। वाहन मन के रख-रखाव अउ आवागमन ल व्यवस्थित करे बर घलो बेवस्था करे गे रिहिस।
भगत मनखे मन के स्वास्थ्य जांच अउ इलाज बर सामुदायिक स्वास्थ्य केंद्र लाटाबोड़ के स्वास्थ्य अधिकारी अउ कर्मचारी दिन-रात तैनात रिहिन। जरूरतमंद श्रद्धालु मन के स्वास्थ्य जांच अउ उपचार करे गे रिहिस।
गंगा मइया के दरबार म मनौती लेके पहुंचथें श्रद्धालु
गंगा मइया झलमला के दरसन करे बर आवत मनखे मन के गंगा मइया ऊपर गहिर आस्था हे। श्रद्धालु मन के मानना हे कि माता के दरबार म सच्चा मन ले मांगल मनौती पूरा होथे। एही आस्था के चलते हर बछर बड़ी संख्या म श्रद्धालु मन गंगा मइया के दरबार म पहुंचथें।
“सुन ले गोहार मइया, सुन ले गोहार वो,
आए हव गंगा मइया तोर दुवार वो।”
गंगा मइया मंदिर समिति डहर ले गौ-गुरुआ के सेवा घलो करे जात हे। गंगा मइया के दरसन करे आवइया श्रद्धालु मन पशुपति भोलानाथ के दरसन पाथें। एखर संग कैलाश गुफा म बारो ज्योतिर्लिंग, दंतेश्वरी माता अउ अंगारमोती माता घलो विराजमान हावय।
ए जम्मो देवी-देवता के दरसन करके श्रद्धालु मन अपन मनौती मनाथें अउ सुख-शांति के कामना करथें। झलमला के गंगा मइया धाम के नवरात उत्सव म धार्मिक आस्था के संग लोक संस्कृति, सेवा अउ सामाजिक सहभागिता के सुंदर संगम देखे बर मिलिस।
डॉ. एस.एल. गंधर्व
झलमला, बालोद
मोबाइल: 9926656038