बदलते समय में खोती छत्तीसगढ़ी दिवाली की परंपराओं को याद करती एक भावुक रचना
अँगना म लगे हे टाइल्स पथरा
गोबर पानी म अब लिपाय नहीं
भीथिया म लगे पुट्टी चिक्कन
छुही पानी अब ममहाय नहीं
तइहा के देवारी अब आय नहीं...
कोनो रईपुर म हे कोनो दुरुग
संगवारी मन अब जुरियाय नहीं
मंद मउहा म सबो झन बुड़े हे
गउरी गउरा म अब सकलाय नहीं
तइहा के देवारी अब आय नहीं...
लईका मन घलो भुलागे जुवा म
सुरसुरी बर कोनो अब रिसाय नहीं
कोठी कुरिया के कोठी घलो नंदागे
ढेकी म धान कोनो अब कुटाय नहीं
तइहा के देवारी अब आय नहीं...
— विक्रमसिंह "लाला"
मुरता, बेमेतरा, छत्तीसगढ़